O 2 de outubro de 2025, celebramos o noso evento «Impulsando Galicia ao mundo: IA, márketing e o poder dunha comunicación efectiva», un encontro deseñado para reflexionar sobre como a intelixencia artificial e a comunicación estratéxica poden impulsar a expansión internacional das empresas galegas.

A xornada reuniu profesionais e empresas con vocación internacional nun espazo de aprendizaxe, intercambio e conexión.

Robert Martin (Magic Beans) abriu o encontro compartindo a súa visión sobre o crecemento e a transformación empresarial, así como exemplos reais de campañas internacionais que conseguiron conectar con outros mercados e as claves detrás do seu éxito.

Xosé Luis Reza Pérez (Iuni Strategic Marketers) moderou a mesa redonda, guiando unha conversa práctica e próxima con empresas galegas sobre os seus procesos de internacionalización. Grazas de corazón aos participantes do noso panel de expertos, Carmen González García (Grupo Rampesca), Maite Valiño Borrego (Grupo Atlante), Sabela Cidrás (El Nogal) e Iago Becerra (Bodegas Terras Gauda), que abordaron os principais retos, erros e aprendizaxes nos seus procesos de internacionalización.

Javier Martínez Torres (Universidade de Vigo) impartiu un obradoiro práctico sobre intelixencia artificial aplicada ao márketing e á internacionalización no cal os asistentes puideron explorar casos reais e ferramentas para analizar mercados, adaptar contidos e optimizar a súa comunicación global.

O evento tamén foi posible grazas á colaboración de Jeloü Comunicación, responsable dos elementos visuais e materiais, e de Pilar Yarza, encargada de documentar a xornada.

Ao longo da xornada, fíxose fincapé nunha idea clave: a internacionalización non depende unicamente do produto, senón de como se comunica e se adapta a cada mercado.

Como conclusión, a iniciativa non só serviu como espazo de intercambio e aprendizaxe, senón tamén como punto de partida para futuras accións orientadas a acompañar e impulsar o talento galego no ámbito internacional combinando estratexia, tecnoloxía e comunicación multilingüe.